M.F.Axundov adına Azərbaycan Milli Kitabxanası

2007-ci ildə

M.F.Axundov adına Azərbaycan Milli Kitabxanası Azərbaycanda kitabxana işi sahəsində dövlət  siyasətini həyata keçirən, milli nəşrləri, xarici ölkələrdə Azərbaycan dilində nəşr olunmuş çap məhsullarını və Azərbaycan müəlliflərinin əsərlərini, dünya əhəmiyyətli nəşrləri, o cümlədən xarici dillərdə çap olunmuş məlumat daşıyıcılarını toplayıb mühafizə edən  milli xəzinə və dövlət kitabsaxlayıcısıdır.

2007-ci il M.F.Axundov adına Azərbaycan Milli Kitabxanasının fəaliyyətinin əsas istiqamətini kitabxana-biblioqrafiya proseslərinin avtomatlaşdırılması, avtomatlaşdırılmış idarəetmə sistemlərinin tətbiqi ilə oxuculara kitabxana xidmətinin müasir tələblərə uyğun qurulmasını təmin etmək, oxuculara və istifadəçilərə virtual rejimdə xidmət göstərmək üçün elektron kitabxananın və elektron kataloqun məlumat bazasının genişləndirilməsini təşkil etmişdir.

Milli Kitabxanada 25 şöbə, 50 bölmə fəaliyyət göstərir və onlarda cəmi 361 nəfər işçi çalışır.

Hazırda Milli Kitabxananın  fondunda  4 482 954  nüsxə ədəbiyyat saxlanılır.  2007-ci ildə kitabxanaya 18 290  nüsxə yeni ədəbiyyat daxil olmuşdur. 

İl ərzində kitabxananın daimi oxucularının sayı 39 716  nəfər, virtual oxucuların (saytdan istifadə edənlər)  sayı  74 447  nəfər, elektron kataloqdan istifadə edənlər isə  22 160  nəfərdir.  Davamiyyət 200 050 nəfər olmuş, kitab verilişi isə 713 444  nüsxəyə çatdırılmışdır.

Azərbaycan ədəbiyyatının arxıvı şöbənin nəzdində fəaliyyət göstərən Mikrofilm bölməsində bu il  131 ədəd ədəbiyyat mikrofilmləşdirib. 104 nüsxə Azərbaycan  dilində kitab, 17 rus dilində kitab, 6 komplekt jurnal, (“Babayi-Əmir”, “Dəbistan”, “Fyuzat”, “Dan ulduzu”, “Əqrəb”, “Dirilik”) 4 komplekt qəzet (“Sədayi-həqq”,“Sədayi- və­tən”) mikrofilmləşdirilmişdir.     

Elektron resursların yaradılması şöbəsinin məlumat bazasına 6057 yeni ədəbiyyat, 4005 adda Azərbaycan ədəbiyyatının arxivi şöbəsinin ədəbiyyatı, kitab verilişi məntəqəsindən isə 2980 adda ədəbiyyat məlumat bazasına daxil edilmişdir. Ümumiyyətlə isə bu günə kimi 33 369  adda biblioqrafik yazı elektron kataloqa daxil edilmişdir ki, bu da 145 496  nüsxə ədəbiyyatı əhatə edir.

2007-ci ildə Milli Kitabxananin saytı (www.anl.az) təkmilləşdirilmiş, onun rus və ingilis dili variantları aktivləşdirilmişdir. Ana səhifəyə “Bunları unutmaq olmaz. Qan yaddaşımız”, “İşğal altında olan torpaqlarımız bizi çağırır”, “Prezidentin mədəniyyət, incəsənət və turizm haqqında Sərəncamları”, “İlin yekunları” və  “Ekspert Komissiyası” adlı düymələr əlavə olunub. “Kitabxanamizin nəşrləri”, “Xəbərlər”, “Yeni kitablar”, “Mədəniyyət, incəsənət və turizm haqqında yeni ədəbiyyat” səhifələri müntəzəm olaraq yeniləşir, yeni materiallarla zənginləşir.

Kitabxana işçilərinin təlimi və tədrisi şöbəsində 2007-ci ilin noyabr ayında rayon MKS direktorları üçün,   2007-ci ilin dekabr ayında isə Müəllimlərin İxtisasartırma kursundan gələn məktəb kitabxana müdirləri üçün “Müasir kitabxanalar və yeni vəzifələr” mövzusunda  mühazirələr oxunmuşdur.

2007-ci ildə kompyuter vərdişləri və Word proqramı üzrə 3 qrupda tədris keçirilmişdir. Dərslərdə Milli Kitabxananın əməkdaşları ilə birgə Bakı şəhər kitabxanalarının işçiləri də iştirak etmişlər.

Kitabxana mütəxəssislərinin ingilis dili sahəsində biliklərini artırmaq və təkmilləşdirmək məqsədilə 4 ay müddətinə pulsuz ingilis dili kursları təşkil olunmuşdur. 2 səviyyədə (başlangic və orta)  keçirilən  kurslarda 2 qrupun  hər birində 12 nəfər olmaqla  24 nəfər kitabxanaçı iştirak edirdi.

Ölkədaxili kitab mübadiləsi  şöbəsinə 2007-ci ildə 53 719 nüsxə kitab daxil olub ki, bunlardan 25 449  nüsxə  Mədəniyyət və Turizm Nazirliyinin xəttilə, 10 116 nüsxə kitab Azərbaycan Respublikası Prezidentinin sərəncamı ilə çap olunan kitablardır. Bunlardan 22 452  nüsxə paylanılıb.

2007-ci ildə Diyarşünaslıq elmi biblioqrafiya  şöbəsi dövri mətbuat materiallarından Azərbaycana dair və ümumi xarakterli məqalələrin  4637 analitik-biblioqrafik yazısını  elektron kataloqun məlumat bazasına daxil etmişdir.  Tam mətnli elektron versiyası olan məqalələr  isə bu  * işarə ilə  biblioqrafik yazıda öz əksini tapmışdır.

Mədəni-kütləvi işlər şöbəsi 2007-ci ildə respublikanın həyatında baş verən tarixi və əlamətdar günlərlə, yubileylərlə, bayramlarla  bağlı 30-a yaxın tədbir- kitab sərgiləri, yeni kitabların təqdimatları, anım günləri və yubiley təntənələri keçirmişdir.

Keçirilən bütün bu tədbirlər mətbuat, radio və televiziya vasitəsilə işıqlandırılmışdır.

M.F.Axundov adına Azərbaycan Milli Kitabxanası Bakı şəhər Mədəniyyət və Turizm İdarəsi ilə birgə  “Bakı kitabxanaları: müasir vəziyyət və gələcək perspektivlər” adli seminar-müşavirə keçirərək, qarşıda duran vəzifələr və onların həlli yollarını müzakirə etmişdur.  Il ərzində Milli Kitabxana tərəfindən Bakı kitabxanalarına bütün məsələlərdə metodik köməklik göstərilmiş, kitabxanalara gedişlər təşkil olunmuş, metodik vəsait və ədəbiyyatla təmin edilmişdir.  

2007-ci ildə Çap məhsullarının qeydiyyatı və Milli biblioqrafiya şöbəsi (Kitab Palatası) tərəfindən nəşri bərpa olunan «Birillik Azərbaycan Kitabiyyatı»nın respublikamızda dərc olunmuş kitabları əhatə edən buraxılışları  (2001, 2003, 2004- cü illər) nəşr olunmuşdur.

2006-cı ilin  birinci  və ikinci yarısında Milli Kitabxanaya daxil olan yeni ədəbiyyatın annotasiyalı  biblioqrafik göstəricisinin I və II buraxılışları, 2007-ci ilin I, II, və III rüblərində kitabxanaya daxil olan ədəbiyyatın siyahısı «Yeni kitablar»  adlı biblioqrafik göstəricidə öz əksini tapmışdır.  

2007-ci ildə Milli Kitabxananın nəşriyyat fəaliyyəti də səmərəli olmuş, 22 adda, 36 buraxılışda: biblioqrafiya, biblioqrafik məlumat kitabı, metodik vəsait, metodik tövsiyyələr nəşr edilmişdir. Çap olunan bütün vəsaitlər respublikanın MKS-nə və Baki şəhər kitabxanalarına vaxtında və operativ surətdə çatdırılmışdır.

M.F.Axundov adına Milli Kitabxananın Mədəniyyət üzrə informasiya şöbəsi  «Mədəniyyət, incəsənət və turizm haqqında yeni ədəbiyyat» adlı cari biblioqrafik informasiya göstəricisini  hazırlamaq işini davam etdirmişdir.

Not nəşrləri və səsyazmaları şöbəsi Azərbaycan ədəbiyyatının arxivi şöbəsində olan notların bir nüsxəsini götürərək özünün arxiv fonduna daxil etmişdir. Bundan əlavə vaxtilə Depozitar ədəbiyyat şöbəsində  yerləşdirilən 127 qutu 6350 nüsxə Azərbaycan notu yenidən şöbənin fondunda yerləşdirilmişdir.  Il ərzində fond kataloq sistemi ilə uzləşdirilib, yoxlanmışdır. Nəticədə 660 qutu 210 min nüsxə yoxlanılmış və yenidən düzülmüşdür.

Kitabxana siyasəti və metodik rəhbərlik şöbəsinin əməkdaşları il ərzində 22 rayonda ezamiyyədə olmuşdur ki, bu da 44 filialı əhatə etmişdir. Bakı şəhər kitabxanalarına mütəmadi olaraq gedişlər təşkil olunmuş, kompleks köməklik göstərilmişdir.

Virtual metodik xidmət vasitəsilə 50-dən çox sorguya cavab verilmişdir.

M.F.Axundov adına Azərbaycan Milli Kitabxanasının beynəlxalq əlaqələri də genişlənmişdir.  11 ölkənin 12 kitabxanası ilə ikitərəfli qarşılıqlı əməkdaşlıq haqqında saziş imzalanmışdır. Xarici ədəbiyyat və beynəlxalq kitab mübadiləsi  şöbəsinə 633 nüsxə ədəbiyyat daxil olmuşdur. Eyni zamanda beynəlxalq kitab mübadiləsi xətti ilə xarici ölkələrin Milli kitabxanalarına onların sorğuları əsasında 381 nüsxə, ölkədaxili kitab mübadiləsinin xətti ilə isə 254 kitab göndərilmişdir. İl ərzində cəmi 635 kitab xarici ölkə kitabxanalarına göndərilmişdir.

Milli Kitabxananın nəzdində fəaliyyət gostərən Ekspert Komissiyasi tərəfindən xaricə aparılmasına 9 icazə sertifikatı verilmişdir. Sertifikatın 3-ü mülki şəxslərə, 6 sertifikat isə sərgidə nümayiş olunacaq ədəbiyyatlar üçün (qaytarılmaq şərtilə) verilmişdir.

2007-ci ildə kitabxananın əməkdaşları tərəfindən dövrü mətbuat səhifələrində 62  material dərc olunmuşdur.